अब कित जाऊँजी हार कर सरणै थॉरै आयो लीरिक्स
Ab Kit Jaoonjee Haar Kar Saranai Thorai Aayo Lyrics
( मारवाड़ी बोली )
अब कित जाऊँजी, हार कर सरणै थॉरै आयो ||
जबतक धनकी धूम रही घर भायाँ सेती छायो ।
साला-साढू भोत नीसरथा, नेड़ोइ साख बतायो ।।
अणगिणतीका बण्या भायला, प्रेम घणो दरसायो ।
एक एकसे बढ़कर बोल्यो, एकहि जीव बतायो ।॥
सभा-समाज, पंच पंचायत, ऊँचो भोत बिठायो ।
वाह-वाहकी धूम मचाई, स्याणो घणो बतायो ।।
घरका सभी, साख सबहीएँ, सबहीकै मन भायो ।
बाताँ सेती सभी पसीनै ऊपर खून बुहायो ।।
लक्ष्मी माता करी कृपा जद, चंचल रूप दिखायो ।
माया लई समेट, भरमको पड़दो दूर हटायो ।।
मात-पितानैं खारो लाग्यो, भायाँ मान, घटायो ।
साला-साढू सभी बीछड़या, कोइ न नेड़ो आयो ॥
‘एक जीवका’ भोत भायला, एक न आडो आयो ।
उलटी हँसी उडाई जगमैं, बेवकूफ बतलायो ।।
टूट्यो प्रेम, छुट्यो सँग सबसूँ, सब कोई छिटकायो ।
नाक चढाकर मुहसू बोल्या, सब जग हुयो परायो ॥
सुखको रूप समझकर जगनें, भोत दिना भरमायो ।
खुल गई पोल, रूप सगलाँको असली चौड़े आयो ।
मिटी भरमना सारी, थारै चरणाँ चित्त लगायो ।
नाथ ! अनाथ पतित पापीनें तुरत सनाथ बणायो ॥